« Ego Gaufridus, decanus, et universitas Capituli Carnotensis presentibus et futuris notum facere curavimus quod Hugo de Galardone1, cum homines Beate-Marie, in quos nichil juris habebat, Robertum, filium Hugonis de Gaisvilla, et Garinum, Ernaldi filium, nimis duriter tractasset, utrumque oculis et genitalibus privando, tandem a nobis et a predictis hominibus nostris eorumque cognatione hujusmodi satisfactionis remedio veniam obtinuit, sicque inter utramque partem pax composita est, et securitas hinc et inde restituta est atque firmata : prefatus siquidem Hugo censui quinque solidorum quem nobis annuatim tam ipse quam pater suus reddere solitus erat censum triplicem adjecit, sicque, in summa, viginti solidos firmissime pepigit Capitulo Beate-Marie, singulis annis, in festivitate sancti Remigii, a se et ab heredibus suis, qui sibi in Galardonis dominationem succederent, in perpetuum persolvendos. Hoc autem fecit, tum pro bono pacis, tum pro pascuis sibi a Capitulo concessis, ut ea deinceps liberius et quietius tam ipse quam heredes sui possiderent quamdiu pretaxatam census summam, viginti scilicet solidos, annuatim, ut dictum est, Capitulo persolverent. Prenominatis vero hominibus nostris, quibus tam tristem atque probrosam membrorum mutilationem intulerat, hanc rependit honorificentiam, solatiumque miserie, atque inopie relevationem : amborum quippe, nunc illius nunc istius, manibus manus suas interserens, utrique ipse hominium fecit2 duosque illis annone modios equipollentis annone refectorii nostri, unicuique suum, dum uterque viveret, pepigit se annuatim daturum, in festivitate sancti Remigii ; quod si alterum eorum mori contingeret, superstiti unum modium, in predicta festivitate, annuatim exsolveret. Preterea plerique militum ejusdem Hugonis, eadem de causa qua et dominus suus, sepedictis Roberto et Garino et quibusdam consanguineis eorum hominia fecerunt. Actum in capitulo nostro anno dominice incarnationis MºCºLXºIXº. Quod ut ratum et stabile permaneret, placuit scripto mandari et sigillo Beate-Marie communiri. Nomina vero eorum qui huic rei interfuerunt placuit subscribi : Gaufridus, decanus ; Amauricus, precentor ; Gislebertus, subdecanus ; Richerius, succentor ; Robertus, cancellarius ; Milo, archidiaconus ; Mathias, archidiaconus ; Gauterius, archidiaconus ; Robertus, archidiaconus ; Ernaldus, archidiaconus ; Gaufridus, prepositus ; Raherius, prepositus ; Haimo, capicerius ; Hubertus, camerarius ; Garinus, presbyter ; Guillelmus, presbyter de Nogento ; Lambertus, presbyter ; Henricus, presbyter ; Willelmus de Jureio ; Fulcherius, presbyter ; Herbertus, presbyter ; Briennius, presbyter ; Gislebertus, diaconus ; Nivelo, diaconus ; Gislebertus, diaconus ; Gaufridus, diaconus ; Guismondus, diaconus ; Milo, subdiaconus ; Gervasius, subdiaconus ; Balduinus, subdiaconus ; Nicholaus, subdiaconus ; Hugo, subdiaconus ; Guido, subdiaconus ; Henricus, subdiaconus ; Godefridus, subdiaconus ; Aucherius, subdiaconus. Ex parte autem sepedicti Hugonis interfuerunt isti : Robertus de Specula3 ; Willelmus, prepositus de Galardone ; Petrus, presbyter. »