« A touz ceulx qui ces présentes lettres verront, l'official de Chartres, le siége vacant, salut en Nostre-Seigneur : Saichés que Geuffroy de Poancé, dit Brumant, escuier, affermant soy avoir, tenir et possider, pour reson de son héritaige, un habergement avecques ses appartenances, assis en la paroisse de Mellé, ou terrouer de Berou, environ quatre muys de terre arable, environ un muy de champt, une piesse de pré, environ vingt sols d'annuel cens, environ dix septiers d'avene d'annuel rente, corvées et vavasseurs, toutes lesquelles choses sont assises en ladicte paroisse de Mellé, ou terrouer devant dit, et meuvent du fié Jehan de Saint-Brisson, chevalier, si comme il disoit, vendit et pour cause de vendition octroya ledit Geuffroy à Guillaume de Berou, escuier, tout l'héritage devant dit, c'est assavoir toutes les choses devant dictes et quicumques choses icelui Geuffroy avoit et possidoit de droit héritaige ou autre quicumque droit, en la paroisse, territoire et fiez devant diz, sans aucune retenue illec fere, pour le pris de neuf vins et dix livres de chartains......... En tesmoing et garnissement de laquelle chose, nous avons fait mettre nostre seel en ces présentes. Donné l'an de Nostre-Seigneur mil deux cens LXXIX, le mardi après l'Ascension Nostre-Seigneur, ou mois de may1. »