« Universis presentes litteras inspecturis, R[adulphus], decanus, et universitas Capituli Carnotensis, salutem in Domino. Noveritis, quod nos, de centum et sexaginta arpentis terre nostre, ad agriculturam redigende, de gastinis nemorum nostrorum de Pinçon, tradidimus et concessimus Arnulpho, dicto Pellipario, de Ponte-Goeni, centum et viginti arpenta, ad arpentum Beate-Marie, extirpanda et ad agriculturam redigenda, et jure hereditario possidenda ad eisdem Arnulpho et heredibus et successoribus ipsius in futurum, ac, et amplius, si ultra dicta centum et viginti arpenta, dictus Arnulphus et ejus heredes, seu successores, voluerint extirpare et extollere de eisdem ; ita videlicet quod dicta centum et viginti arpenta et amplius, si amplius extirpare voluerint, conjuncta, continua ac adherencia existant, in parte illa in qua dictus Arnulphus eligere voluerit eadem, quodam tamen chemino interposito per quod itur de Curvavilla ad forestam. Que centum et viginti arpenta terre, et amplius, si de dictis gastinis amplius habere voluerit, cum omni jure proprietatis quod in eis habemus, quitamus et concedimus dicto Arnulpho et ejus heredibus et successoribus in futurum, tali [conditione] quod idem Arnulphus et ejus heredes et successores tenentur solvere nobis vi modios [frumenti], in loco ubi redditus prebendariorum dicti loci solvi consuevit, ad festum sancti Remigii anni Domini MºCCºLXº tercii, et extunc, quolibet anno, ad dictum festum, et in dicto loco decem denarios censuales pro quolibet arpento dicte terre tradito et concesso a nobis dicto Arnulpho, et quod idem Arnulphus infra festum sancti Remigii, quod erit anno Domini MºCCºLXº quarto, tenetur dictam terram, sic a nobis traditam, totaliter marnasse ; et quod idem Arnulphus et ejus heredes et successores in futurum decimam et campipartem fructuum in dicta terra excrescencium, nobis, vel mandato nostro, quolibet anno, solvere tenebuntur et garbas dictorum decime et campipartis ducere seu portare apud Carnotum. Et conventum est inter nos et dictum Arnulphum quod dictus Arnulphus vel ejus heredes, racione dicte terre, aliquam talliam nobis solvere non tenebuntur. Verumtamen, si dicta terra ad alios quam ad heredes dicti Arnulphi devenerit, vel alii quam dictus Arnulphus et ejus heredes hostisias ibi fecerint, ipsi, racione dicte terre seu hostisiarum, tenebuntur nobis talliam solvere, quocienscumque terras ecclesie Carnotensis contigerit talliare. Nos enim promittimus bona fide..... In cujus rei testimonium et munimen, presentes litteras dedimus dicto Arnulpho, sigillo nostro sigillatas. Datum anno Domini MºCCºLXº primo, mense marcio. »