Cession d'un usufruit à Champagne par Odierne la Caconne

A touz ceus que ces presentes lettres verront ou orront Adans Halos baillis de Senlis saluz. Nous fesons savoir a tous que pardevant Adam le Clerc et Jehan de Senlis bourgeois de Biaumont sur Oyse auditeurs especiaument establiz pour ice en ice lieu, du commandement le Roi et du nostre, vindrent en propre personne Odierne la Caconne de Champaignes et Symonnet son fiex, et reconnurent de leur bon gré que il avoient vendu quitié et otroié a touz jours au mestre, aus freres et aus sereurs de la Meson Dieu de Pontoise toute l'action & le droit & la seisine que il avoient & pooient avoir aus ne leur hers, en une piece de terre dont le tresfons est a la dite Meson Dieu, qui siet derriere les fossez de la Meson Dieu de Champaignes joignant à la terre Roger de Soumeville dune part et a la terre qui fu Jehan Golent dautre part... Et ont renoncié en ice fet a touz privileges de crois prise et a prendre, a toutes aides de droit, de canon et de loy, et a toutes autres choses qui contre ces presentes pourroient estre opposées et alleguiées. U tesmoing de ceste chose nous avons seelé ces presentes lettres du seel de la baillie de Senlis... en l'an mil cc. lxxxiii, u mois de septembre.