Ego H[ugo], Aurelianensis ecclesie decanus, universumque ejusdem ecclesie capitulum, omnibus presentem paginam videntibus in Domino salutem. Tam presentium quam futurorum noverit universitas, quia nos attendentes emendationem a Johanne, archidiacono nostro, et ab Ansello, fratre ejus, in ipsorum domibus factam, considerantes preterea integritatem devotionis quam erga ecclesiam nostram impendere dinoscuntur, ad preces utriusque concessimus ut, post decessum eorum, quicquid pensionis ex domibus illis proveniet in amborum anniversariis dividatur. Et ut hec nostra concessio firmior permaneret, sigilli nostri munimine fecimus roborari. Actum in capitulo nostro, in vigilia Nathalis Domini anno incarnationis Dominice MCXCIIII.