« Universis presentes litteras inspecturis, Albericus, permissione divina Carnotensis episcopus, salutem in Domino. Noverit universitas vestra quod cum magister Unfredus, presbiter et persona ecclesie de Rambolleto, traheret in causa coram nobis auctoritate apostolica abbatem et conventum Beati Maglorii Parisiensis super medictatem decimarum novalium sitarum infra metas parochie de Rambolleto, quas dicebat dictus Unfredus dictum abbatem et conventum percipere in prejudicium et gravamen dicti Unfredi et ecclesie predicte. Peteret etiam coram nobis a dictis abbate et conventu valorem octoginta et sexdecim modiorum, scilicet bladi pro medietate et avena pro alia medietate quod dicebat dictum abbatem et conventum percepisse temporibus retroactis in predicta medietate novalium. Tandem dictus Unfredus ex una parte, et procurator dictorum abbatis et conventus, prior Montisfortis ex altera, in jure constituti coram nobis composuerunt in hunc modum. Quod dictus Unfredus et quisquis post ipsum erit persona ecclesie de Rambolleto solvet annuatim infra festum Beati Remigii, nomine admodiacionis, dictis abbati et conventui sex modios medietatem bladi et medietatem avene ad mensuram de Sparnone pro omnibus decimis quas dicti A. et C. percipiebant infra fines parochie de Rambolleto, tam grossis quam minutis usque ad presentem diem quocumque modo haberent aut percipere possint. Pro qua admodiacione dictus procurator dictorum A. et C. quitavit dicto presbitero et cuilibet successori ejus in perpetuum omnes decimas quas antea percipiebant infra fines parochie de Rambolleto, et nihil de cetero percipient in novalibus dicte parochie tam factis sive et in posterum faciendis. Hanc autem compositionem volumus et comprobamus tanquam judex a sede apostolica in causa predicta datus, et tanquam episcopus, judex ordinarius loci in quo site sunt ecclesia de Rambolleto et decime prenotate. In cujus rei memoriam. Actum Carnoti anno Domini MºCCº quadragesimo primo die veneris ante. Isti sunt dies1. »