« In nomine Domini amen. Per hoc presens publicum instrumentum pateat universis, quod anno a nativitate ejusdem millesimo trecentesimo xliiijº, indictione xiijª die quarta mensis februraii, pontificatus sanctissimi in Xristo patris ac domini, domini Clementis divina providencia pape VIⁱ, anno tercio, in mei publici notarii et testium subscriptorum presencia personaliter constitutus Jacobus dictus Boiliau, clericus, parisiensis diocesis, qui quidem recognovit se dedisse contulisse et etiam concessisse et adhuc dedit contulit et concessit absque animo revocandi, in bono statu et memoria existente, religioso viro et honesto domino priori sive prioratui Sancti Thome de Sparnone carnotensis diocesis, in puram liberam et perpetuam elemosinam post decessum ipsius, donatione facta inter vivos, unam grangiam quam ipse dicebat et asserebat se habere de proprio conquestu suo apud Ramboullet in censiva domini de Ramboullet, ex eadem solvendo eidem domino tres solidos quolibet anno ad festum beati Remigii, situatam ante cimeterium ecclesie dicti loci de Ramboulleto. Quam grangiam dedit et elemosinavit dictus clericus pro salute anime ipsius dicto domino priori sive prioratui supradicto, obligans ad hoc omnia bona sua se, heredesque suos quod contra premissa seu aliqua premissorum non veniret per se seu per alios et de actis prout sunt superius diuisa nichil revocabit sed melius prout potuerit affirmabit. Super quibus et singulis dictus dominus prior peciit mihi notario infra scripto sibi fieri publicum instrumentum. Acta fuerunt hec in quadam camera dicti prioratus circa horam tercie, sub anno, indictione, die, mense et pontificatu predictis, presentibus ad hoc Johanne de Vico, clerico, Johanne Regis et pluribus aliis testibus vocatis specialiter et rogatis. »

(Suite le monogramme du notaire.)

« Et ego Johannes Liart Constanciarum diocesis publicus auctoritate imperiali notarius, premissis omnibus et singulis una cum dictis testibus presens interfui, et premissis propria manu scripsi et in hanc formam publicam redegi, signoque meo consueto signavi rogatus in testimonium premissorum. »