Magister H[ugo], curie Parisiensis officialis, omnibus presentes litteras inspecturis, salutem in Domino : Noverit universitas vestra quod Archambaudus de Balneolo, in nostra presencia constitutus, dedit et concessit abbacie de Vallibus Sarnaii, in perpetuam elemosinam, quoddam terceolum vinee de hereditate sua, situm in valle de Meroles, et quoddam quarterium plante et dimidium, situm ad Portam Galan ; ita quidem quod dictus Archambaudus predicta, quiete et pacifice, quamdiu vixerit, possidebit, et post ejus obitum ad prefatam abbaciam libere revertetur. Confessus etiam fuit coram nobis predictus Archambaudus quod de propriis nummis memorate abbacie emit tria quarteria plante et dimidium sita juxta plantam supradictam et eidem coherencia, et quoddam quarterium vinee situm ad Bordel, que dictus Archambaudus libere et quiete in perpetuum quitavit abbacie supradicte. Richardus vero Cordele, frater predicti Archambaudi, omnia supradicta in perpetuum quittavit abbatie memorate, fide corporaliter prestita quod super premissis nichil de cetero reclamabit. Quod ut ratum et firmum permaneat, ad instanciam predictorum Archambaudi et Richardi, presentem paginam sigilli curie nostre munimine duximus roborandam. Actum Parisius, anno gratie Mº CCº vicesimo primo, mense novembri.