" C. officialis Parisiensis, de vendicione cujusdam nemoris Symonis de Ramboel juxta Folosium. "
- A Original en parchemin. — Inv., p. 48, l. A, nº 3.
- a Cartulaire de l’abbaye Notre-Dame des Vaux-de-Cernay, de l’ordre de Cîteaux, au diocèse de Paris, éd. Lucien Merlet et Auguste Moutié, Paris, 1857-1858.
Universis presentes litteras inspecturis, officialis curie Parisiensis, in Domino salutem : Notum facimus quod Symon de Rambeul, armiger, et Eustachia, ejus uxor, asseruerunt quod habebant et possidebant et tenebant in feodo a Guillelmo de Rambeul, milite, fratre ejusdem Symonis, quamdam petiam nemoris, continentem circiter viginti arpenta nemoris, siti juxta nemus abbatis et conventus Vallis Sarnaii, quod nemus vulgariter Fonlleus1 appellatur ; quam peciam nemoris idem Symon et Eustachia, ejus uxor, dicebant liberam et quittam esse ab omni redditu, censu, servitute, corveia, costuma et obligatione ; et sub hujusmodi libertate ipsi Symon et Eustachia recognoverunt coram nobis se dictam peciam nemoris et fundum ejusdem nemoris et omne jus, dominium, justitiam et juriditionem que in eadem pecia nemoris habebant vel habere poterant quoquomodo vendidisse et quittavisse in perpetuum viris religiosis, abbati et conventui Vallium Sarnaii, pro quadraginta duabus libris parisiensibus, eisdem venditoribus jam solutis, ut confessi sunt coram nobis ; renuntiantes, etc........................
Guillermus vero de Rambeul, frater dicti Simonis, miles, de cujus feodo movet predicta pecia nemoris, ut idem Guillelmus asseruit coram nobis, predictam venditionem et omnia predicta et singula voluit, acceptavit et laudavit, volens et concedens ut dicti abbas et conventus et eorum monasterium predictam peciam nemoris sub libertate superius expressa habeant, teneant et possideant in perpetuum, in manu mortua, sine coactione vendendi aut ponendi extra manum suam. Et insuper de dicta venditione tenenda et garentizanda se plegium constituit coram nobis pro dictis venditoribus erga dictos abbatem et conventum, et per fidem, et omne jus et dominium quod, tanquam dominus feodi, in predicta pecia nemoris habebat vel habere poterat, quittavit et concessit et remisit et cessit in perpetuum, sub fide prestita, abbati et conventui superius nominatis : promisit etiam sub eadem fide se effecturum et procuraturum quod Matilpdis, uxor ejus, omnia predicta et singula laudabit et concedet et consimilem quittationem faciet, et de non veniendo contra fidem dabit. .
