A touz ceus qui ces lettres verront et orront, Guillaume Postel, garde du seel de la prévosté de Vernon, salut : Sachent que par devant nous furent présens Guillaume le Prince l'ainsné et Ysabel, sa femme, et Durant li Vavasseur, et Erembourt, sa femme, de la parroisse de Saint Souplis jouste Vernon, et Jehan le Prince, et Erembourt, sa femme, de la parroisse de la Chapele-Saint-Euxin, et requéroient que eulz avoient ensembles vendu, quitié et délessié, à touz jours, par non de vente, à homes religieulz, à l'abbé et au couvent de Sarney et à leur successeurs, c'est assavoir quatre soulz et deus deniers parisis de anuel rente ; de laquele rente lesdis acheteurs leur en devoient vint et chinc deniers à la saint Denis, sus une pièce de terre assise en la paroisse de Tilly, entre le prieur et le couvent de Saucheuse d'une part et d'autre ; et le prieur et le couvent de Saucheuse leur en devoient vinc et cinq deniers au terme dessusdit, sus ladite pièce de terre. Et furent présens Richard Malclere et Denise, sa femme, de la paroisse de Heubecourt, qui furent principaulz vendeurs et s'acordèrent à la vente dessusdite, ausi comme les autres, pour quarante et deus soulz parisis, etc.............

En tesmoing de ceu, nous avon mis à ces lettres le seel de la prévosté de Vernon, sauf le droit le roy et l'autri. Ce fu fet l'an de grace mil troiz cens et seze, le dimenche après la saint Aubin.