Universis presentes litteras inspecturis, officialis archidiaconi Pissiacensis, salutem in Domino : Noveritis quod Ulricus de Buxeria, Philippus, dictus Moulle, clericus, et Henricus, dictus Leurel, exequtores testamenti deffuncti Clementis, dicti Gueignart, ut dicebant, recognoverunt predictum Clementem dedisse et nomine donationis concessisse, in ultima voluntate sua, quando suum condidit testamentum, viris religiosis abbati et conventui Vallium Sarnaii, in puram et perpetuam [elemosinam], ob remedium anime sue, quatuor solidos parisienses, annis singulis, in Nativitate Domini, percipiendos et habendos super quandam peciam terre dicti Clementis, site, ut dicitur, in territorio de Bena, juxta craeriam de Bena, ex una parte, et terram Dyonisii le Cosrier, ex altera, in censiva et dominio Radulphi Carpentarii. Que quidem terra movebat ex hereditate dicti Clementis, ut dicebant. Voluit autem et ordinavit dictus Clemens in suo testamento, [ut dicebant], quod si heredes dicti Clementis dictis religiosis dictos quatuor solidos solvere recusarent, quod ipsi heredes dictis religiosis decimam omnium bonorum que in dicta terra percipientur pro tempore vel poterunt percipi, annuatim solvere teneantur. Hanc autem donationem factam fuisse, sicut superius est expressum, confessa est Agnes, relicta dicti Clementis, et eandem donacionem et concessionem voluit, laudavit et concessit ; promittens, fide in manu nostra prestita corporali, quod contra donationem istam seu concessionem, ratione dotis sive dotalicii, per se vel per alium, non veniet, nec aliquid reclamabit nec reclamari faciet in futurum. In cujus rei testimonium, dictis religiosis presentes litteras sigillo nostro dedimus sigillatas. Datum mense aprili, anno Domini Mº CCº sexagesimo sexto.