A touz ceus qui ces lettres verront, Pierre li Féron, garde de la prévosté de Paris, salut : Sachent tuit que par devant nous vint en jugement Robin, dit Griffon, de Fontenay, escuier, recongnut que feu Nicholas le Berthier de Soucy, familier jadis de l'église du Val de Cernay, avoit pieça donné et aumosné à ladite église deus pièces de pré, assises entre Fontenay et Quiquenpois, dont l'une est assise entre le pré Rogier de Soucy, escuier, et d'autre part à Clyment Baillehoe, contenant environ sept quartiers de pré, lesquieus estoient feu Nicholas dessusdit, mouvans dudit Robin en cinc deniers de cens ; et l'autre pièce assise oudit leu, tenant d'une part au pré du Val des Escoliers, d'une part et d'autre, contenant trois quartiers de pré ou environ, mouvans dudit Robin à deus deniers de cens, et à deus au prestre de Fontenay, és quieus trois quartiers ledit feu Nicholas avoit environ les trois pars. Et recongnut ledit Robin que il avoit vendu et amorti souffisaument à l'abbé et au couvent de l'église dessusdite, comme sire tresfoncier dudit leu, excepté le droit au prestre dessusdit, les prez dessusdiz et tout le droit et toute l'action que ledit Robin y avoit comme seigneur tresfoncier, à tenir perpétuelment desdiz religieux, pour le pris de trente et deus livres parisis, etc................... En tesmoing de ce, nous avons mis en ces lettres le seel de la prévosté de Paris. Ce fu fet l'an de grace mil CCC et nuef, le samedi après l'Ascension.