A touz ceus qui ces lettres verront et orront, Nicholas Gascoing, clerc, garde du seel de la prévosté de Vernon, saluz : Sachez que par devant nos furent présenz Robert Perronelle et Bertaut Havart, et recognurent, de bonne volenté et non contreint, que il avoint quitée et déleessée de tot en tot, en plene propriété, une masure, asisse à Gamilli, entre la masure que fu Richart le Prestre, d'une part, et la masure Guillaume Gonec, de l'autre, à hommes religieus, l'abbé et le couvent de Nostre-Dame de Vaus de Sarnay, pour XIII sous VIII deniers, que l'en devoit sus ladite masure à diz religieus, d'annuel rente, laquele masure est appellé la masure Raol Leleu, sanz nulle réclamance dudit Robert ne dudit Bertaut ne de leur ers de ladite masure estre feste doreenavant ; et promistrent et jurèrent sus seinz ledit Robert et ledit Bertaut par devant nous que james encontre ceste quitance, ne par eus ne par autre, ne vendront ne ne feront venir. Et ce certifion nous et en teimoingnon par ces lettres seelées du seel de la prévousté de Vernon. Ce fu fet l'an de grace M. CC. IIII^xx et seze, le mardi d'amprès la feste de Marie Magdalene.